É bo minina, bo é di tarrafal? Obi li

É bo minina, bo é di tarrafal? Obi li
É bo minina di tarrafal
ngosta de bo sima txas kalina labanta un pé.
Minina ngosta di bo
sima karkanhada di papan ora ke tá ferga na pedra lá pontona na bokal tardi.

Minina ngosta di bo
sima katxupa na fasi salbaxaria na ferbura.
Minina ami propi si bu fitxa koraju ku ranja ku mi
nta bira levianu na bo ku munti grans di basofaria.
Sima Júlio Boka na fasi Kel konduson na entrada mangui.

Minina
Nta tranforma água mar di baxu en leti em pó
ki tudu noti nta sotou kol na masu masu,
ki nhu munti burmedju tá djata de kontentamentu,
Graciosa ta bira stanguloria ki eta stika si boka
sima lifanti tá pupa na hora da nossa morti antis maxi.

Mas minina
ami também su kre nta dou flor,
korason, ku kinzi basora ku panela di três pé.
Inda si bu kre nta dou
ramul koku pó subi ti riba pó papia ku Deus
po flal ma bu homi é mas bunitu ki el.

Minina ngosta di bo sima futuru sen verbu
ora kinta konjuga bu korpu na dimeu,
sima friesa ku maresia na orelal ridonda.
Minina nta amou sima bento tá konsedja grasiosa.

Minina
Pan flou un kusa propi?
Bo ku bu bexu, perna, odju, kundindin tudu é mas grasiosa.
Mina pan flow un kusa?
Ami é tolobasku na mosas de Mangui.
Minina ami si bu bai ti ku dan,
Nka tá tomal na masu nau,
Nta tomal dunbes.

Autor Tharka Vassus