Nos Tarrafal

Cima amor di lua pa céu..
Cima amor k lua tem pa céu bu fazem tem pa bó..
Cima guarda noturno ta anseia odja raio di sol na fusca fusca si k bu tenem..
Cima kes corderos k ta conta hora pa odja feitiço ta realiza, si k bu pom..
Cima kes mudjer ku munti palavreados, assi k n bem transforma...

Nka dabu lua pamodi nka podi kol nem nka tem el,
Raio sol, é tcheu..mós es ta fica longi, es sta spadjado, nka ta podi carragás na peto pam bem kol
Nka kordero nem nka kre ser, bu amor k sta dento mi ta fazi magia..
N bira combersadera, ku stória pa konta minino di mundo intero, n fika ku kurasom murgudjado na kel amor sem fim k n teni pa bó..k na cada instantinho ta sai um kusa nobo, um kusa sabi, um kusa ké só pa bó..

É um tristeza k só Diós na céu k sabi..
Teneu longi sem sakuta bu kurasom..
Ta tram tudo nha emoçom..
Ta fazem perdi nuçom..
Mas n sta agarrado na nha ilusom..

Mós.. momentos pikinotis é kes k nu sta djunto..
tempo ta corri...
nunca nka flabu tudo kel k n tinha pam flabu..
nunca tempo dexam mostrabu kel k alma kria desabafaba..

k ta animam é sabi ma kel Diós k desenha mundo..
k abri agu..
k poi sol raganha..
k tenem bibo...
um dia, ku tudo si poder també...
é ta fazeu ser nha bebé..

alá sim...kel tempo k nunca txigano nós k ta bira si dono..
kel mundo k era grandi pa nós 2 ta bem tornano pikinoti..
kel sonho k distancia fria..
ta ser quentado...
e kel k nu sunha um dia..ta ser realizado...

Por: Dicla Gonçalves, 20/ 05/2011