Minina Bu salbaxaria

é sta nsaiadu na sentura de tanboru rasgadu
pa brota korpu i sal sagradu na mundu ta sangra txoru
di otus vóz na homi mudu
bu salbaxia
é sta ku bexu tran, odjus bran, naris ku kankan.

na ponta di bu kosta
homis tá puterou bu mundu branban
bo só é salbaxa
ora ki kimika di korpu zinga i bu nega pinga
na kalor o na inventa amor
na gran di suor di korpu na stikon ki kre puterabu.

Minina obi li
abo é tunturun ki tá rispondi tentason di kes odjus runhu
minina bu ten salbaxaria ben fetu ku gostu de bifi
homis kreu,

minina salbaxaria
é bu rostu karagadu grasa ora ki matxu stikau punhu i alinsa
salbaxaria
é ora ki bu nega aliansa pa bu mereci badiu di fora
karagadu sporia na pé na tenpu de azagua
i agu na odju em troka di kontentamentu.

salbaxaria
é bu bati koxa na terra batidu na son salbaxu di gaita
sabaxaria
é ora ki bu kentura kusinha farinha e bo é furmentu forjadu na meiu di mundu
bu mundu propi tem sidu badia ku padas de afrika na korpu nteru
bo propi é pon ki homi kre kumi, kunpradu o dadu só pa un noti
nen si for so pa sonhu ô mesmu ki inventadu.

Salbaxaria é
bus saia fora di stason ora ki homis fika salbaxu
ku astusia na bus saia gaitagaita
antis de stikon di bentu,
fumus di terra ki tá spiou antis di rudimuinhu ku bida na invadi bu korason.

bu salbaxaria
é bati kontentamentu ku bida pa ganha surisu
bu salbaxaria
é suri pa kravus burrus e ganha floris mansu
bu salbaxaria
é disfarsa espertesa e ganha kurason de homi ku nosentesa
bu salbaxaria
é abri boka na ora sertu
iduca ku konsertu ti mininu bira homi
bu salbaxaria
é guarda amor dentu bistidu noiba
pa lenbra del di bes en kuantu ora ki homi perdi fé

bu salbaxari
é ora ki naturesa tapa odju i bo bu ta bira furakon ki ta altera clima si strutura
dja tem tenpu ki bu naci berdi, kabuverdiana de nomi ana
so bo ki ta splica giografia des kabu seku,
bu ifeitu feitisu, disfasi di vulkon
stilu gentis grasiosa na poi tornu na nebua  spions de txuba.

bu salbaxari
é mara homi ku bu mandinga santifikadu inxinadu pa rei skravisadu
undi bu erda bu korpu stilo guitara
i gatiamnetu di melodias ku uns ponta di pitada de tabaku.

Minina Bu salbaxari 
é ser mudjer.

Autor: tharkavassus